பின்னோடச் செய்துவிடும்

பதவியை விட்டு வந்தவர்கள் பதவிக்காகப் போராடுவதும்
பணத்தை உதறிவிட்டு வந்தவர்கள் பணத்திற்காக ஓடுவதும்
கர்த்தரின் கையில் கொடுத்த எதிர்காலத்தை
கையில் எடுத்து கவiலை கொள்வதும்
பின்னடைய மாத்திரமல்ல பின்னோடச் செய்துவிடும்

வேதனை எதற்கு?

சிந்திக்கும் உன்னை சிந்தியாதவர்கள்
நிந்தித்து முந்திக்கொள்வார்கள்
வேறுவிதமாய் அவர்கள் சிந்திப்பதற்கும்
வேராகியது உன் சிந்தைதானே
வேதனை எதற்கு?

முட்டுக்கட்டை

 
பாதுகாப்​பைத் தேடி பதுங்கவேண்டும் என ஓடி
மன்னவனின் எல்லையை விட்டுவிட்டு
மண்னவனின் எல்லைக்குட்படாதே - அவன்
புறமுதுகுக்குப் பின்னால் போர்வீரனாக நில்லாதே
முன்னால் மனிதன் மலையாக இருந்தாலும்
மலையாகப் பின்னால் மனிதன் நின்றாலும்
முன்னேறுவதற்கு அது முட்டுக்கட்டைதான்

கல்லறை

இயக்கிவிட்டும் இயங்காமல்
தொடங்கிவிட்டும் தொடராமல்
செய்ய அறிந்தும் செயலிழந்து
செய்யாதிருப்பவன் மனதே கல் அறை
கல் அறையும் கல்லறையும் ஒன்றுதான்
கல் அறை உடலுக்குள்ளே கல்லறையில் உடல் உள்ளே

உள்ளத்தில் உள்ளவன் ​போதும்

உன் உள்ளத்தில் உள்ளவன் ​போதும்

பாடையில் கிடப்பவன் படையெடுத்து வருவானா
ஆடையே இல்லாதவன் ஆயுதம் ஏந்தி வருவானா
உடையுள்ள நீ உயிருக்குப் பயந்தால்
ஆடையில்லாத அவன் அரசனாகிவிடுவான்
விடையைத் தேடாதே வெற்றி உனக்குத்தான்
குளம் உடைந்தால் அது நீ குளிப்பதற்கு
வெள்ளம் என நினைக்காதே - அதை அடக்க
உன் உள்ளத்தில் உள்ளவன் ​போதும்

சிதையாய் சிலைக்கு மாலை

சிந்தித்தவர்கள் பலர் சிதையாகிவிட்டனர்
சிலையாகி வீதியிலே சிற்பங்களாகிவிட்டனர்
சிந்தியாதோர் சிந்தையை சிலையாக்கிவிட்டு
சிதையாய் சிலைக்கு மாலையிடுகின்றனர்

புதைந்துகொள்ளாதே

புயல் அடிக்கிறது என்று புதைந்துகொள்ளாதே
வெளியிலேயே நில் உன்னை அது
வான்வெளிக்குக் கொண்டு செல்லட்டும்
உனது அம்பு எதிரிகளை வீழ்த்தும்
எதிரிகளின் அம்பு உன்னை உயர்த்தும்

 

பாதையில் வருவதற்குப் பயந்து
தவறான பாதையில் செல்லாதே
தவறான பாதையில் செல்பவர்தான்
தனது பாதையைக் காட்ட பயப்படுவர்

 

எல்லாம் தெரிந்தவர் எவருமில்லை
எதுவும் தெரியாதவரும் எவருமில்லை
எல்லாம் தெரிந்தவர் போல நடிப்பவரும்
எதுவும் தெரியாதவர் போல நடிப்பவருமே
உலகத்தில் அதிகம்